مفيش حد عبيط
كلها بتدور ع السيط
وتريند الساعه التخبيط
والكل سايقها استعباط
كله بيرمي بلاه
وبيلقح علي خلق الله
وياخابت ياصابت وياه
ونشوفه ف كل القنوات
زمن البجحين
بقي ليهم سعر وناجحين
ورصيدهم عدي الملايين
ونعاتب علي مين ونلوم
ماحنا الخايبين
غلينا وعلينا واقعين
وقتلنا طموح الشاطرين
وعملنا من الخيبه نجوم
دنيا تريندات
ومحدش عارف مين مع مين كله اشتغالات
ناس بلا مبدأ بايعه ضميرها وقابضه مشاهدات
بنصدر أزمه عشان نشغل بعض بتفاهات
والكل يشارك أزمتنا ويعملها حالات
زمن الشهادات
مركونه ع الرف وبقي كله فاتحلك باثات
والحاله العامه بقيت تكسف وتجيب إحباط
كله ملوش شغله قاعد فاضي يطلع اشاعات
وبيرخص نفسه وبيهينها عشان الدولارات
أزمة أخلاق
وبنكدب ونقول أرزاق
واتظلمت كلمة أذواق
واختلت كل الموازين
مبقاش في كسوف
وبعينك دول بص وشوف
كلها بقي وشها مكشوف
والوضع بجد بقي مهين
فوبيا المشاهير
خلتنا صغير وكبير
أسرارنا مابقتش ف بير
وحياتنا الشخصيه مشاع
شغلتنا الشير
بنتاجر بهموم الغير
ومحدش فينا بقي يغير
علي شرفه وعرضه المتباع
ليست هناك تعليقات:
إرسال تعليق